ممنوع روايات حياه الالفي

في مرة الشركة كانت هتخسر مناقصة كبيرة بسبب غلطة في الأرقام، مازن كان هيتجنن، سما قعدت معاه لحد الفجر تراجع الأرقام واكتشفت الغلطة وصلحتها، المناقصة رسيت عليهم، مراد عرف باللي عملته وشكر مازن وشكرها، بس شكر مازن أكتر، سما ادايقت وحست إنه لسه شايفها قليلة، دخلت مكتبه وقالتله على فكرة أنا اللي اكتشفت الغلطة مش مازن لوحده، قالها عارف، قالتله أمال شكرته هو بس ليه، قالها عشان انتي المفروض تعملي كده ده شغلك، سما خرجت وهي بتعيط وقررت إنها مش هتسمح لحد يقلل منها تاني.

مراد بعدها حس إنه زودها، راح لمازن وقاله أنا ليه بعمل كده، مازن قاله عشان انت بتخاف تحبها، انت خايف تضعف قدامها، مراد سكت، مازن قاله الحب مش ضعف، الحب قوة، مروان دخل وقال يا جماعة صلوا على النبي، البت غلبانة وبتحب الشغل، مراد قال عندكم حق، وتاني يوم جاب لسما شيكولاتة وحطها على مكتبها من غير ما يقول مين اللي جابها، سما عرفت إنه هو وابتسمت لأول مرة من قلبها، وسلمي شافت الشيكولاتة واتغاظت أكتر.

من بعد الموقف ده مراد بدأ يتغير، بقى ييجي بدري، بقى يتكلم مع الموظفين كويس، بقى يشكر سما لما تعمل حاجة، سما لاحظت التغيير بس قالت ده تمثيل، وفي يوم كان عندهم اجتماع مهم مع مستثمر أجنبي، المترجم مجاش، سما كانت بتعرف انجليزي كويس من الكورسات اللي كانت بتاخدها على اليوتيوب، وقفت وترجمت الاجتماع كله بطلاقة، المستثمر مضى العقد بسببها، مراد كان طاير بيها، بعد الاجتماع قالها قدام الكل برافو يا سما انتي أنقذتي الشركة، سما ابتسمت لأول مرة ليه ابتسامة حقيقية.

مازن لاحظ إن مراد بقى يحب يقعد في المكتب أكتر، بقى يخلي سما تجيب له القهوة ويقعد يبص عليها وهي ماشية، بقى يسألها كلتي إيه، نمتي كويس، أمك عاملة إيه، سما كانت مستغربة، وفي يوم أمها تعبت جدا ونقلوها المستشفى، سما طلبت إجازة ومراد قالها خدي أسبوع، وراح وراها المستشفى من غير ما تقوله، دفع فلوس المستشفى كلها، لما سما عرفت راحت مكتبه وقالتله انت ازاي تعمل كده من غير ما تستأذني، أنا مش شحاتة، مراد قالها أنا مش بعتبرك شحاتة أنا بعتبرك مسؤولة مني، انتي بتفكريني بنفسي لما بدأت من الصفر، سما اتكسفت وسكتت.