ممنوع روايات حياه الالفي

سما كانت واقفة قدام باب شركة كبيرة جدا في وسط البلد، ماسكة الفايل بتاعها اللي فيه السي في بتاعها ومبلول من العرق من كتر التوتر، لابسة طقم بسيط جدا كانت مستلفاه من صاحبتها حنين، جزمتها مقطوعة شوية من الجنب وبتحاول تداريها، هي محتاجة الشغل ده بأي طريقة، أمها تعبانة وأخوها الصغير في المدرسة ومفيش دخل غيرها بعد ما أبوها مات، دخلت الريسبشن لقت بنت شيك جدا اسمها سلمي قاعدة بتبص لها من فوق لتحت، قالتلها عندك انترفيو مع مين، قالتلها مع مستر مراد صاحب الشركة، سلمي ضحكت ضحكة صفرا وقالتلها ده انتي داخلة على النار برجليكي، ده مدير متسلط وكل البنات اللي اشتغلوا هنا يا إما حبوه يا إما اتطردوا، ده قانونه، أي موظفة تعجب بيه بيطردها تاني يوم، عشان مش عاوز وجع دماغ.

سما بلعت ريقها ودخلت، لقت مكتب كبير أوي وفيه واحد قاعد لابس بدلة غالية وشكله مغرور جدا، ده مراد، عنده تلاتين سنة ووارث الشركة من أبوه ومكبرها وبقى من أشهر رجال الأعمال، بس سمعته زفت مع الموظفين، بيحب كل حاجة تمشي بالمسطرة، صوته عالي وبيزعق، بص لسما وقالها انتي سما اللي جاية تقدمي على وظيفة سكرتيرة، قالتله أيوه، قالها بتعرفي تشتغلي تحت ضغط، قالتلها أنا متربية تحت ضغط الحياة نفسها فمتقلقش، عجبته جرأتها، سألها أسئلة كتير وهي بترد بثقة رغم إنها من جواها بتموت، وفي الآخر قالها مبروك اتقبلتي بس عندي شرط، ممنوع تحبيني، لو حبيتيني هطردك، سما بصتله بقرف وقالتله هو انت فاكر نفسك ليلى علوي ولا إيه، أنا جاية اشتغل مش جاية أحب، وعلى فكرة انت مش ذوقي خالص، مراد اتصدم أول مرة بنت تقوله كده، وضحك وقالها هنشوف.

أول يوم شغل كان جحيم، مراد كان قاصد يزهقها، يطلب منها قهوة فتجيبها يقولها باردة، تطبعه ورق يقولها فيه غلطة، يخليها تسهر لحد الساعة عشرة بالليل، سما كانت بتعاند أكتر، مرة قالها اعمليلي القهوة من غير سكر، عملتها بسكر زيادة، قالها انتي بتستهبلي، قالتلها لا انت اللي طلبت مني أعملها بمزاجي وأنا مزاجي مسكر النهاردة، مراد كان هيتجنن منها، بس في نفس الوقت كان معجب بعنادها، كل البنات اللي قبليها كانوا بيحاولوا يتدلعوا عليه ويلبسوا قصير عشان يعجب بيهم، إنما دي بتلبس واسع ومش حاطة مكياج وبترد عليه كلمة بكلمة.