صحبتي روايات محمد نور

صاحبتي الأنتيم سرقت مني 3 عرسان... وكل الناس كانت بتقولي المفروض تشكريها! أول مرة شفت فيها صاحبتي الأنتيم طالعة من باب الفندق وهي حاضنة خطيبي، كل الناس كانت فاكرة إن صوتي هيرج الشارع من الصويت والسرخ. بس هي سبقتني وبدأت تعيط قبلي! مسكت في إيدي بعنف وعينيها بتدمع: — يا هدى، أرجوكي تفهمي الصح وما تظلمينيش! أنا بس كنت بحاول أختبر لك يوسف عشان أمتلك دليل قوي هل بيحبك بجد ولا بيتسلى بيكي! جنبها، يوسف وِطّى راسه في الأرض وهو بيتمتم: — أنا آسف يا هدى.. حقك عليا. بصيت للأولاني وبعدين للثانية.. المشهد ده كان كفيل يكسرني ويدمرني تماماً. ساعتها أصحابي وقرايبي قالولي خليكي عاقلة وكبيرة وتفهمي موقفها: "إذا كانت شهد قدرت تاخده منك بسهولة كده، يبقى يوسف عمره ما حبك من قلبه." "المفروض تبوسي إيدك وش وظهر وتشكريها.. دي كشفت لك حقيقته وبينت لك معدنه قبل ما تلبسي معاه!" وده اللي عملته بالظبط ساعتها.. سامحت شهد. وبعدها كملت "جميلها" معايا ورجعت تساعدني تاني! اختبرت الراجل الثاني اللي حبته وعشت معاه قصتي.. وبعده الراجل الثالث.. ولما عدت السنين، وصلت بقلة أصلها إنها أوقعت الراجل الوحيد اللي كنت متمنية أكمل عمري معاه وأتجوزه! لما كملت أربعة وتلاتين سنة، كنت بقيت جث..ة من غير روح، مش قادرة أثق في بني آدم على وش الأرض. عايشة مرعوبة من مجرد فكرة إن قلبي يدق أو أحب تاني. بس المرة دي، لما وقفت قدام نفس الفندق.. وفي نفس الليلة الشؤم.. وشفت نفس الخيانة الأولى بتتكرر.. المرة دي مدمعتش ولا نزلت دمعة واحدة، وقررت أرد الاعتبار وألعبها صح. سألت بصوت هادي: — نمتم سوا؟ وش يوسف اتخطف واصفرّ زي الميت. شهد اتنطرت ودخلت في النص فوراً عشان تدافع: — يا هدى ما تضغطيش عليه أكتر من كده! الراجل كتر خيره حاسس بالذنب وميت في جلده! كررت سؤالي تاني بنفس الثبات: — نمتم سوا؟ يوسف حط لسانه في بؤه وخرس. ودا كان جواب كافي جداً بالنسبة لي. ابتسمت وقولت: — شكراً! بصولي هما الاثنين كأن جالي جنان أو عقلي طار مني. شهد سألت باستغراب: — أنتي قلتي إيه؟ — قلت لك شكراً! كلامك كان صح.. واحد زي يوسف ده خسارة فيه الكلام وما يستاهلش أزعل عليه ثانية. الابتسامة الخبيثة المستخبية في عينين شهد تبخرت في لحظة! طلعت تليفوني.. عملت بلوك ليوسف من كل حتة. — كل شيء بيننا انتهى. يوسف حاول يمسك إيدي وهو بيلعثم: — يا هدى استني بس، سيبيني أشرح لك اللي حصل... زقيت إيده وبعدت عنه. شهد رجعت تعيط وتعمل نمرة الصعبانية تاني: — أنا مش ممكن أسمح إن قصتنا وصداقتنا تروح عشان خاطر راجل! ابتسمت ببرود: — طمني بالك.. عمرك ما هتلاقيني بأتخانق معاكي أو بأخسر حد عشان خاطر راجل. وسبتهم ومشيت. بعد خمس دقائق بس، جروب الأصحاب على الواتساب ولع نار! "يا هدى، شهد كان كل قصدها تساعدك وتفتح عينيكي!" "يوسف ده ندل ومبتدع، الحمد لله إنك اكتشفتيه بدري!" "شهد لسه طالعة من تجربة قاسية وفسخ خطوبة ومكسورة الجناح ومحتاجة دعمنا!" "عشرة أكتير من عشر سنين بينكم، بلاش تهدّي البيت عشان حتة عيّل!" بدل ما أجادل وأحرق في دمي كالعادة، كتبت جملة واحدة بس: "عندكم حق بصراحة.. شهد عندها موهبة جبارة وخبرة في اختبار الرجالة." محدش فيهم فهم اللغز ولا القصد من كلامي. تاني يوم نزلت شغلي عادي جداً. لقيت على مكتبي كوباية قهوة سخنة. وكان في ورقة مكتوب فيها: "شكلك مجهدة وتعبانة.. أتمنى القهوة دي تظبط مودك ونهارك يروق." اللي كان سايبها هو طارق زهران، واحد من مديري الشركة. عنده ستة وتلاتين سنة. شيك، ألماني في لبسه، كلامه معسول، ومش هوريك.. مسمع في الشركة كلها بإنه بيحب يبص للستات الحلوة وينكشهم. بدل ما أحط حدود بيني وبينه وأبعد عنه زي ما بعمل دايماً، المرة دي صوّرت كوباية القهوة ونزلتها ستوري: "إحساس حلو أوي لما تلاقي حد فاكرك وبيصبح عليك من الصبح." شهد ما كملتش دقيقتين وكانت داخلة لي على الخاص: — إيه ده إيه ده؟ معجب جديد ولا إيه؟ ما رديتش عليها وسبيتها تأكل في نفسها. على آخر النهار، طارق بعتلي بوكيه ورد للشركة. وبالليل عزمني على العشاء في مطعم شيك على النيل على طول. طبعاً نزلت صور العشاء والجو الشاعر. شهد كتبتلي تاني فوراً: — واو! شكله راجل تقيل وراقي جداً. ابتسمت.. المصيدة بدأت تقفل! على يوم الجمعة، عزمتها تتعشى معانا. شهد جِت لابسة فستان أسود مجسّم ومكشوف، ينفع لأي حاجة إلا إنه يكون لـ "خروجة صحاب"! طارق ما قدرش يشيل عينيه من عليها طول القعدة. وطول العشاء، شهد نازلة طحن وتدبيس في قصص قصيرة عن الرجالة اللي ظلموها وعقدوها في عيشتهم: — هييييه.. أصل الراجل الناضج الكبارة اللي زيك ده عمره ما يقسى على ست أو يجرحها، ولا أنا غلطانة؟ طارق ابتسم بخلبوصة وقال: — على حسب الست اللي قدامه! شهد وشها جاب ألوان واتكسفت. ولما خلصنا أكل، عملت نفسها دايخة ومش قادرة تمشي. طارق عرض يوصلنا بعربيته. وصلني أنا الأولى بيتي.. وبعدين طلع بيها هي في الكنبة الوراانية. ليلتها نمت نومة هنية ما نمتهاش من سنين! الساعة عشرة الصبح تاني يوم، جالي مسج على التليفون. من شهد. صورة! عرفت الأوضة بتاعة الفندق على طول أول ما شفتها. كان في كاسين على الترابيزة. وفي حرف الصورة يبان طرف ساعة طارق الذهبية. وتحت الصورة شهد كاتبة: "هدى.. أنا محتاجة أحكيلك حاجة مهمة أوي، أرجوكي ما تزعليش مني!" فضلت بصاصة للشاشة شوية.. وبعدها ضحكت من قلبي. عشان شهد الغبية لسه ما تعرفش حاجة واحدة بس.. طارق عمره ما كان الراجل اللي أنا عاوزة أختبره! هو كان مجرد طُعم.. والراجل الحقيقي اللي كان على وشك يدخل رادارها ويثير فضولها... كان الشخص الوحيد اللي يقدر يهد ويكسر كل اللي شهد بنته وطوّرت فيه طول السنين اللي فاتت! بصيت لكام ثانية في الصورة اللي شهد لسه باعتها لي. وبعدين كتبت لها: — إيه اللي حصل؟ تلات نقط ظهروا فوراً على الشاشة. اختفوا. رجعت النقط تظهر تاني. وفي الآخر وصلني مسج طويل عريض: — يا هدى، والله العظيم ما كان قصدي ولا كنت عاوزة ده يحصل! أنا شربت كتير امبارح وما كنتش حاسة بنفسي.. وطارق أصر يوصلني عشان كان خايف عليا.. طلعنا الأوضة بس عشان نتكلم، وفجأة كل حاجة حصلت بسرعة! كنت متخيلة شكلها بالظبط وهي بتكتب الكلام ده، وبتنقي كل كلمة بعناية شديدة عشان تلعب دور الضحية. كان نفس السيناريو والحجج المهروسة اللي استخدمتها مع يوسف زمان! الشرب.. الضعف.. الليغبطة.. وإن الراجل هو اللي قدرش يقاوم جمالها واندفع! وطبعاً شهد هي الضحية البريئة اللي وقعت في الفخ بسبب طيبتها وجاذبيتها اللي ما تتردش! رديت عليها: — نمتي معاه؟ عدت تلاتين ثانية. — أيوه.. وضافت فوراً بعدها: — بس يا هدى صدقيني، ده أكبر دليل على إنه راجل ندل وما يستاهلش ضفرك وما ينفعكيش! طلعت مني ضحكة عالية! شهد حافظة مش فاهمة، وبتكرر نفس الكلام والتمثيليات الحقيرة. رديت ببرود: — عندك حق. فصلت شوية عقبال ما ترد: — أنتي مش زعلانة؟ — أزعل ليه؟ — افتكرتك معجبة بيه ومهتمة. — إحنا خرجنا اتعشينا سوا مرتين مش أكتر. شهد اتلخبطت وظهرت حيرتها في الكلام: — يعني.. أنتي ما كنتيش بتمشي معاه ولا بينكم حاجة؟ — أنا عمر ما قلت إن بيننا حاجة. بعد المسج ده، اختفت وما كتبتليش تاني لمدة ساعة كاملة. أنا كنت فاهمة كويس أوي إيه اللي يدور في دماغها. شهد ما كانتش متضايقة لأنها خانت صاحبتها وسرقتها.. هي كانت مفقوعة ومقهورة لأنها اكتشفت إنها كسبت سباق وهمي ما كانش موجود اصلاً! يوم الاثنين، لقيت طارق زهران واقف لي جنب الأسانسير. كان شكله مجهد وشكله ما نامش طول الليل. — هدى.. عديت من جنبه بمنتهى الجفاف: — صباح الخير يا طارق بيه. وشه اتغير واتخطف: — محتاجين نتكلم. — في شغل؟ — عن اللي حصل يوم الجمعة. — مش شايف إن فيه أي حاجة تخصني عشان نتكلم فيها. مشي ورايا في الممر: — شهد قالتلي إنكم زي الأخوات وأكتر. وقفت وبصيت له: — فعلاً.. إحنا كده. — وعشان كده افتكرت إنك ممكن تكوني.. — مغلولة أو بغير؟ طارق سكت وما عرفش يرد. ابتسمت: — إحنا مش مرتبطين يا طارق. الكلمة دي ضربت كبريائه وغروره في مقت..ل، أشد بمية مرة من أي خناقة أو نمرة غيرة. — أومال العزومات والعشوات دي كانت إيه؟ — عزومات عادية. — والورد اللي بعته؟ — ذوق منك وأنت اللي اخترت تبعته. طارق جز على سنانه وهو متغاظ. وفي اللحظة دي، جيه صوت راجل من وارنا: — يا طارق! طارق اتشد وجسمه اتخشب. أنا كمان لفت. أيمن الألفي كان ماشي في الممر وجنبه اثنين من مديري القطاعات. مدير العمليات بالشركة.. عنده أربعين سنة. راجل جاد، ثقيل، قليل الكلام، وابن خالة جوز أختي الكبيرة. في الشركة تقريباً محدش يعرف إن فيه صلة قرابة أو معرفة بين عيلتنا وعيلته. أيمن بص لي بصلة خاطفة: — الاجتماع هيبدأ كمان تلات دقائق. — طالع فوراً. طارق مشي بسرعة. أيمن استنى لحد ما الممر فضي تماماً وبقينا لوحدنا. — الراجل ده بياضيقك في حاجة؟ — لا خالص. — كان يبان عليه إنه بيلح عليكي. — موضوع وانتهى خلاص. أيمن بص لي بتمعن كام ثانية: — أختك قالتلي إنك فركشتي مع يوسف. أه.. أختي! الوحيدة اللي من أول يوم كانت بتقولي بوضوح: "اللي بتفرح وهي بتختبر حدود خطيبك وتلعب معاه، دي مش صاحبتك ولا بتتمنى لك الخير." وللأسف زمان ما كنتش بسطع كلامها وكنت بعدي. — أيوه، فركشنا. أيمن هز راسه متفهم: — تمام.. أحسن. رفعت حتة حاجب: — أحسن؟ — عمره ما دخل لي من زُور بصراحة. — دي صراحة وشفافية عالية أوي! ولأول مرة أشوف ابتسامة خفيفة بتترسم على وش أيمن: — أنا ما بحبش ألف وأدور. ومشي ودخل مكتبه. بالليل، عملت حركة مقصودة ومحسوبة بالملي. نزلت صورة على الستوري لترابيزة عليها كوبايتين قهوة. قدامي يبان بس إيد راجل لابس قميص أبيض وساعة سوداء ثقيلة. مش باين أي حاجة ثانية. وكتبت تحتها: "فيه كلام بيبجي في وقته المضبوط تماماً." شهد ما كملتش خمس دقائق وكانت داخلة لي فوراً: — إيه ده؟ واحد تاني؟! ما رديتش. بعدها بخمس دقائق: — هدى، مين ده رد عليا؟ بعد نص ساعة: — أوعى يكون ده الراجل اللي شفته معاكي قبل كده في حفلة الشركة؟ ابتسمت.. بلعت الطُعم وبدأت تتحرك زي ما أنا عاوزة. بعد يومين، شهد نطت لي قدام المكتب وفي إيدها كوبايتين قهوة: — مفاجأة! البنت بتاعة الاستقبال دخلتها لأنها حافظة وشها من سنين. شهد كانت لابسة بالطو كريمي، وبوت طويل، ومكياج كامل كأنها رايحة سيشن تصوير. — كنت قريبة من هنا قلت أعدي عليكي وناخد غدا سوا. — يا محاسن الصدف! — أنتي مشغولة؟ — شوية. عينيها بدأت تلف في المكان وتتفحص المكاتب: — طارق هنا؟ — في اجتماع. حاولت تبان مش مهتمة وتتكلم بعادية: — أها.. تمام. الرد ده أكد لي اللي كنت متأكداه. طارق خلاص مابقاش ليه أي قيمة عندها ولا فارق معاها. الموضوع بالنسبة لشهد عمره ما كان عن الراجل نفسه.. الموضوع عندها مسابقة وتحدي، عاوزة تثبت لنفسها وليا إن أي راجل يبص لي، هي تقدر تاخده مني في ثواني لو حطته في رأسها! وفجأة، باب الأسانسير اتفتح. خرج أيمن. شهد سكتت فوراً والكلام وقف في زورها. عرفته على طول! من كام شهر كانت شافته معايا في عزومة عائلية وسألتني عنه. وساعتها قلت لها ببساطة: "حد من القرايب." أيمن كان ماشي ناحيتنا ولابس بالطو أسود أنيق على إيده. — هدى. — أيمن. شهد بصت لي.. وبعدين بصت له هو. وشفت في عينيها اللحظة بالظبط اللي قررت فيها إن أيمن هيكون صيدها الجديد! — مش تعرفينا ولا إيه؟ عرّفتهم ببعض: — أيمن الألفي.. شهد كامل، صاحبتي. مدت إيدها بابتسامة ناعمة: — الأنتيم! أيمن سلم عليها بجمود: — أهلاً وسهلاً. ولا كلمة زيادة! ولا بصلة تانية، ولا ابتسامة مجاملة، ولا النظرة إياها اللي شهد متعودة تشوفها في عينين أي راجل بتكلمه. وهو ده بالظبط اللي شعلل شهد ونور عينيها! الموضوع مابقاش مجرد شقاوة ولا دلع.. بقى تحدي ولازم تكسر الراجل ده! الأسبوعين اللي بعدهم كانوا مسرحية كوميدية بجد. بدأت شهد تسألني بعفوية خبيثة: — هو أيمن ده متجوز؟ — لا. — مرتبطة طيب؟ — على حد علمي لا. — عنده كام سنة؟ — أربعين. ضحكت ضحكة خفيفة: — تقيل وراسي.. بحب السن ده! وبدأت تظهر وتطب في أي مكان تعرف إن فيه أي مناسبة تبع شغلنا. غداء عمل خيري.. حفلة افتتاح فرع جديد.. تجميعة للشركة.. كانت دايماً بتلاقي حجة وتخرم عشان تكون موجودة، وطبعاً بتحاول تقرب من أيمن بكل الطرق. وأيمن كان دايماً ذوق ومؤدب جداً.. وما بيعديش الحدود ولا بيديها عقاد نافع! وده كان هيجنن شهد وهيطلعها عن شعورها. في يوم كلمتني التليفون: — هدى، أنا بحس إن أيمن ده بيكرهني! — ليه بتقولي كده؟ — مابيديش أي رد فعل خالص! — والمفروض يدي رد فعل لإيه؟ سكتت شوية وقالت: — ولا حاجة.. فكك. أنا ابتسمت. زمان شهد كانت بتقدر توقع الرجالة لأنها كانت بتمسك مفتاح كل واحد فيهم. يوسف كان عاوز حد يحسسه إنه البطل ويطبل له. والثاني كان يدور على الشقاوة والجنان. والثالث كان محتاج الدلع والاهتمام. شهد كانت بتعرف الثغرة وتدخل منها وتلعب بيها. بس أيمن كان مختلف تماماً. مش لأنه ملاك.. بس لأنه راجل عارف حدوده كويس وفاهم هو عاوز إيه. وده الدرس اللي أنا فهمته متأخر أوي. الأمانة والخيانة مش مربوطة بإن مفيش واحدة حلوة ظهرت في السكة! الأمانة مربوطة بالبني آدم نفسه واختياره. في يوم جمعة، أيمن عزمني على معرض صور فوتوغرافية. وافقت. مش عشان أستخدمه أو أغيظ بيه شهد.. بالعكس، كنت حاسة بذنب وخوف. أيمن راجل محترم وما يستاهلش أدخله في اللعبة دي أو أستغله. وقبل ما ننزل من العربية، قلت له بصراحة: — أيمن، لازم أقولك على حاجة غريبة وبصراحة شديدة. أيمن بطل العربية وبص لي: — سامعك. — شهد غالباً بتحاول تقرب منك أو هتجرب تتشاطن عليك. — هي بتعمل كده بالفعل من فترة. اتنطرت في مكاني: — أنت عارف؟ — يا هدى، البنت دي باعتالي امبارح صورتها وهي بتسألني عن رأيي في فستان عاوزة تشتريه! حطيت إيدي على وشي من كسوفي: — يا نهار أبيض.. — وكمان سألتني إذا كنت بتمرن لوحدي ولا مع كابتن! — أنا آسفة بجد على القرف ده. أيمن بص لي بهدوء: — أنتي بتعتذري لي عن تصرفات واحدة ثانية ليه؟ ما عرفتش أرد. كمل كلامه: — أختك حكت لي كام حاجة عن يوسف وعن اللي شهد كانت بتعمله زمان. — ما حكتلكش كل حاجة. — بس أنا فهمت الباقي. أخدت نفس عميق.. وحكيت له الحقيقة. فهمته طريقة شهد. إزاي بتحاول تثبت لنفسها إنها تقدر تاخد أي راجل يبص لي.. وإزاي تظهر بعدها في دور الصاحبة الجدعة اللي بـ "تختبر" الرجالة عشان تحميني! أيمن سمعني للاخر من غير ما يقطعني. ولما خلصت قال بكلمة واحدة حاسمة: — ده مش اختبار لرجالتك يا هدى.. ده اسمه تخريب وتدمير متعمد. الكلمة دي خبطت في قلبي أوي. تخريب! طول السنين اللي فاتت، كل اللي حولي كانوا بيسموها "اختبار"، وكأن شهد دي جهاز كشف الكذب أو ميزان أخلاق! بس الحقيقة إنها كانت بتخلق الظروف بنفسها، تبعت مسجات، تتقرب في السر، وتبتكر الفرص، وبعدين تاخد النتيجة عشان تبكتني وتكسرني بيها! — أنا المرة دي عاوزاها تفشل وما تلاقيش اللي بتدور عليه. أيمن حط إيده على الدركسيون: — عاوزاني أعمل نفسي مهتم وأمثل عليها؟ — لا! الرد طلع مني بسرعة وبدون تفكير. بص لي وسألني: — ليه لا؟ — عشان ده هيخليك جزء من لعبة رخيصة، وأنا مش عاوزة كده. أيمن بص في عيني بثبات: — تمام.. سيبيني أتعامل بطبيعتي خالص. — وهتعمل إيه؟ — أقولها لا.. بوضوح. الرد كان بسيط جداً لدرجة إني كنت هضحك! بالنسبة لأيمن، الحدود مش معركة ولا حاجة محتاجة بطولة.. القصة كلها إن الراجل لما يكون مش عاوز، ببيقول "لا" وخلاص. بس شهد ما قبلتش الـ "لا" دي بسهولة. في ليلة سبت، اتصلت بيا: — أنتي مع أيمن؟ بصيت لأيمن اللي كان قاعد قدامي في مطعم إيطالي هادي: — أيوه. — أنتوا في ديت؟ أيمن رفع حجبيه لما سمع صوتها طالع من التليفون. — ممكن يكون كده. سكتت شوية وقالت بصوت ماليانه خباثة: — هدى، مش حاسة إنك متسرعة أوي؟ أنتي يادوب لسه طالعة من تجربة ومفركشة! — عادي يعني. — أنا بس خايفة عليك وبحاول أحميكي.. الرجالة الكبار دول بيبقوا عارفين إزاي يلعبوا بالبنات ويعملوا عليهم حركات! أيمن كتم ضحكته بالعافية. رديت: — هبقى أخد بالي.. شكراً. قفلت السكة. أيمن سألني: — هي دايماً بتتدخل كده؟ — دايماً. — حاجة مجهدة أوي بصراحة. وفي الأسابيع اللي بعد كده، شهد زودت اللعب أوي. بدأت تبعت لأيمن مسجات.. رد عليها مرتين بذوق وبجفاف، وبعد كده طنشها وما بقاش يرد. بدأت تظهر في الأماكن اللي هو بيروحها كأنها بالصدفة. في يوم الصبح، ظهرت في الكافيه اللي بيشتري منه قهوته. أيمن بعتلي صورة من هناك وهي باينة في الخفية، وكتب لي: "صاحبتك لسه سالاني حالا هل أنا بؤمن بتوأم الروح ولا لا!" رديت عليه بسرعة: "اطلع اجري!" رد عليا: "دفعت حق القهوة خلاص.. أقدر أستحمل دقيقتين كمان!" قعدت أضحك على المسج ده من قلبي. وفي اللحظة دي، أدركت حاجة كانت تخوفني أوي.. أنا بدأت أعجب بأيمن بجد! مش عشان أغيظ شهد ولا عشان أثبت حاجة.. أنا أُعجبت بيه لأنه راجل واضح وصريح وما بيلعبش. لما بيقول ه يكلمني، بيكلمني. لما بيكون مشغول، بيقولي أنا مشغول. لما حاجة بتضايقه، ببيقولها في وشي فوراً. بعد سنين من التحليل والشك وتفسير المسجات والنظرات، الوضوح بتاعه كان زي طوق النجاة. وده خافني أوي.. لأن زمان، كل ما كنت أبدأ أثق وأسلم قلبي، شهد كانت بتظهر وكل حاجة تتهد على رأسي. فبدأت أبعد وأنسحب بالراحة. أيمن لاحظ ده فوراً: — أنا عملت حاجة ضايقتك؟ — لا. — أومال فيه إيه؟ — مفيش. حط الشوكة من إيده بص لي بجدية: — هدى.. اتنهدت قلت له بصراحة: — أنا خايفة. — مني؟ — خايفة الحكاية تتكرر تاني بنفس الطريقة. أيمن سكت كام ثانية وبعدين قال كلام صدمتي: — أنا ما أقدرش أوعدك إني عمر ما هأذيكي أو إن الحياة مش هيكون فيها مشاكل. الرد ده فاجئني أوي! أي راجل تاني كان هيقول كلام معسول زي "عمره ما هأذيكي" و"أنا غيرهم وتثقي فيا". بس أيمن قال: — بس أقدر أوعدك بحاجة واحدة.. إني عمر ما هحمل حد تاني مسؤولية اختياراتي وقراراتي. أنا الراجل وأنا المسؤول عن أفعالي. حسيت بغصة في حلقي.. ده كان بالظبط الكلام اللي كنت محتاجة أسمعه طوال حياتي. شهد عملت ملعوبها الأخير في حفلة الشركة السنوية. أنا كنت عارفة إنها مش هتفوت الليلة دي. جت لابسة فستان أحمر مكشوف، وكعب عالي، ومكياج كامل. ودخلت من غير دعوة وقالت في الباب إنها المرافقة بتاعتي. وفي نص الحفلة، اختفت من المكان. بعد عشر دقائق، جالي مسج من أيمن: "غرفة الاجتماعات، الدور الـ 18." طلعت فوراً. باب الأوضة كان موارب سنة صغيرة. سمعت صوت شهد وهو بيلف ويدور: — أنا مش فاهمة أنت ليه بتعمل نفسك مش شايف الكيميا اللي بيننا؟ أيمن رد بهدوء قاتل: — عشان مفيش كيميا اصلاً. — أنت مش محتاج تراعي مشاعر هدى للدرجة دي! — أنا مش براعي مشاعرها.. أنا بكلمك عن نفسي. — أومال إيه اللي مانعك؟ سكت أيمن ثانية وقال بوضوح: — أنا مش مهتم بيكي يا شهد. شهد ضحكت ضحكة مش مصدقة: — بجد؟ — أيوه. — كل الرجالة بتقول كده في الأول! — يبقى يمكن جه الوقت اللي تبدأي تسمعي فيه لما حد يقولك لا. صوت شهد اتغير وبقى فيه غل: — هدى هي اللي ملمياك من ناحيتي وسوّدت وشي قدامك! — هدى ما احتاجتش تقول حاجة.. أفعالك هي اللي بتتكلم. سكتت شهد، وبعدين غيرت الخطة ولعبت كارت الدموع والصعبانية: — أنا مش فاهمة هي ليه بتعاملني كده! ده أنا طول عمري بحاول أحميها وأفتح عينبها على الحقيقة! رد أيمن ببرود: — بأنك تنامي مع الرجالة اللي في حياتها؟ — هما اللي كانوا بيجروا ورايا! — ممكن بعضهم.. بس أنتي اللي اخترتي تستجيبي وتكملي معاه. صوت شهد بقى ناشف وقاسي: — الراجل اللي ينفع يتسرق، يبقى عمره ما كان بتاعها من الأساس! أيمن رد بجملة عمري ما هنساه طول حياتي: — البني آدمين مش ملكية حد عشان يتسرقوا يا شهد.. وعشان كده كل واحد مسؤول عن اختياراته وقذارته. شهد سكتت تماماً وما عرفتش ترد. في اللحظة دي، فتحت الباب ودخلت. وش شهد اصفرّ وبقى زي اللوح! — هدى.. — أهلاً. بصت لأيمن وبعدين بصت لي: — أنتي كنتي بتتصنتي؟ — سمعت المفيد. — الموضوع مش زي ما أنتي فاهمة خالص! ضحكت ضحكة خفيفة: — أنتي برضه كنتي بتختبريه عشاني؟ عينيها اتملت دموع متصنعة: — أنا بس كنت عاوزة أثبت لك إن.. — إن كل الرجالة بيجروا ورا أي واحدة تديهم شوية اهتمام؟ — لا! — ولا عاوزة تثبتي إنك أحلى وأشطر مني؟ — لا طبعاً! — أومال بقالك سنين بتنسجي الملاعيب دي ليه؟ ما عرفتش تجاوب! ولأول مرة، شهد ملقاتش سيناريو حافظاه تقول. كملت كلامي: — يوسف.. وطارق.. وقبلهم كل راجل كان بيظهر في حياتي وتبدأي تنكشيه وتجربي حظك معاه. وشها اتشد وقالت بغل: — طارق اصلاً ما كانش خطيبك ولا حبيبك! — برافو عليكِ.. بالظبط كده! اتثمرت مكانها وذهولها زاد: — إيه؟ — أنا عمر ما كان بيني وبين طارق حاجة. أخدت كام ثانية عشان تستوعب الصدمة: — والورد؟ — هو اللي بعته بذوقه. — والعزومات والصور؟ — شغل عادي.. وأنتي اللي كملتي بقية القصة من خيالك وشياطينك! ابتسمت وسبتها تتسلوق في أفكارها. وشها اتغير وفهمت الفخ: — أنتي نصبتي لي كمين! هزيت رأسي بنفي: — لا يا شهد.. أنا عمر ما طلبت منك تروحي تنامي مع طارق ولا زقيتك عليه. أنتي اللي جريتي برجليكي لأنك مريضة.. أنتي سميتي الخيانة والغل اختبار، وما حدش طلب منك تعملي كده! الدموع نزلت من عينبها بجد المرة دي من القهرة: — يا هدى.. إحنا أصحاب من المدرسة! — كنا. — هتبددي عشرة العمر دي كلها عشان خاطر رجالة؟ نفس الجملة! نفس النغمة اللي كانوا بيحبطوني بيها زمان. بس المرة دي، الكلمة ما هزتنيش ولا أثرت فيا. قربت منها خطوة وقولت بثبات: — أنا مش بفركش صحوبيتنا عشان خاطر راجل.. أنا بنهيها عشانك أنتي. عشان نضيف حياتي منك. شهد سابت الحفلة ومشيت وهي بتعيط من القهرة. تاني يوم الصبح، بدأت حملة التشويه المعتادة. جروب الأصحاب نزل عليه رواية ثانية خالص من إخراج شهد. طلعتني أنا المفترية اللي بيلعب بمشاعرها وبستخدم طارق عشان أضايقها وأجرحها، وإني استخدمت أيمن عشان أهينها وأذل عشرة سنين بدم بارد! التليفون بدأ يجيله مسجات: سارة: "هدى.. أنت زودتيها أوي المرة دي!" مريم: "شهد مكسورة وبتعيط طول الليل!" نور: "كان ممكن تتكلموا في السر بدل الفضايح دي!" زمان، كنت هقعد أدافع عن نفسي، وأبعت سكرين شوتس وفويسات وأشرح وأبرر. المرة دي كتبت جملة واحدة بس: "اللي عاوز يفضل صاحب شهد يتفضل.. أنا مش جابرة حد يختار بيننا، بس أنا أخدت قراري وخلاص شهد بره حياتي تماماً." عملت ميوت للجروب وقفلته. بعد يومين، سارة اتصلت بيا.. ما رديتش. بعدها بعتت لي: "أنا أسفة يا هدى.. حقك عليا." وبعدها مريم.. وبعدها نور. والسبب ظهر في نفس اليوم بالليل! طارق زهران اكتشف إن شهد كانت بتمشي وبتبعث نفس المسجات والظرف لمدير تاني متجوز في الشركة. والمدير ده مراته قفشت المسجات على تليفونه وما سكتتش! الورق اتكشف والسكرينات نزلت. شهد كاتبة لطارق: "أنت الراجل الوحيد اللي بحس معاه بالأمان".. ونفس الجملة بالحرف للمدير الثاني! ولواحد ثالث: "هدى عمرها ما هتقدر قيمتك ولا تفهمك زيي". شهد ما كانتش ضحية ولا مظلومة.. شهد ده كان أسلوب حياتها وطبع فيها. ولما الحقيقة وضحت للكل ومش عليا أنا بس، الكل شاف وشها الحقيقي. بعد تلات شهور، طارق قدم على نقل لفرع تاني. وشهد اختفت تماماً من دائرتنا وقعدت في بيتها. وحاولت فترة تعمل شو على الفيس وتنزل حكم عن "الصحاب الخونة" و"الصفار" و"الناس اللي بتغير من نجاحك". ما رديتش ولا صنعت لها أي اعتبار. زمان كنت بفتكر إن المكسب إني أثبت للناس إني صح.. دلوقتي فهمت إن المكسب الحقيقي إني مابقيتش محتاجة أثبت حاجة لحد اصلاً! بعد ست شهور، أيمن أخدني نفس المطعم الإيطالي. طلّع علبة صغيرة من جيبه. قلبي اتخطف وأغمى عليا من المفاجأة: — أيمن.. فتح العلبة.. كان فيها مفتاح! ابتسم وقال: — قبل ما تروحي لبعيد، ده مش خاتم. اتنهدت وضربته على دراعه، فضحك وقال: — أنا اشتريت بيت جديد. — بيت؟ — أيوه.. وعاوز المفتاح ده يكون معاكي. مش عشان تغصبي نفسك على حاجة، ولا توعديني بشيء.. بس عشان تبقي عارفة إن فيه مكان مفتوح لك في أي وقت تقرري فيه إنك عاوزة تشاركين حياتك معايا. عيني اتملت دموع.. زمان كنت بخلط بين الملاوعة والحب.. بين الغيرة والاهتمام. أيمن ما كانش بيضغط عليا ولا بيطلب مني وعود.. كان بيديني حرية الاختيار. أخدت المفتاح: — يمكن في يوم من الأيام. ابتسم بثقة: — وأنا مستني اليوم ده. والـ "يوم من الأيام" ده جه بعد ثمان شهور. وبعد سنتين، اتجوزنا. شهد طبعاً ما كانتش معزومة. بس يوم الفرح الصبح، جالي مسج من رقم غريب: "أتمنى تكوني مبسوطة.. بجد." بصيت للمسج فترة طويلة.. وبعدين عملت له مسح. مش لأني لسه بكرهها.. بس لأني مابقيتش محتاجة أرد ولا فارقة معايا. أختي خبطت على الباب: — هدى.. العريس والناس مستنيين تحت! قفلت التليفون وسبته: — طالعة فوراً. أيمن كان واقف في أخر القاعة، أول ما شافني طالعة عليه، ظهرت على وشه نفس الابتسامة الهادية اللي عمرها ما احتاجت تثبت حاجة لأحد. وأنا ماشية ناحيته، فهمت أخيرًا الدرس اللي أخد مني سنين عشان أتعلمه.. شهد كانت دايماً بتقول إنها بـ "تختبر" الحب. بس الحب الحقيقي مش محتاج واحدة ثانية تدخل وتلعب وتنكش عشان تثبت معدنه. الناس حقيقتها بتبان لوحدها.. من حدودهم.. من قراراتهم.. ومن اللي بيعملوه لما يكونوا فاكرين إن محدش شايفهم. يوسف اختار يخون.. وطارق اختار يستغل الفرصة.. وشهد اختارت تخلي كل علاقة مجرد مسابقة مريضة! وأنا.. اختارت أخيراً أبعد عن أي حد بيأذيني. أنا ما استردتش حياتي لما انتقمت من شهد.. أنا استرديتها من اليوم اللي بطلت فيه أسمح لها تحدد قيمتي وسعادتي. النهاية خاص لصفحة روايات وحكايات محمد نور و وردة احمد

مقالات ذات صلة

تزوج امراه هادئه

حماتي رودي خالد

لما جوزي طلقني زهره الربيع

جدو روايات حياه الالفي

سر الساعه

انتي مراتي علي الورق

اترك تعليقاً إلغاء الرد