جوزي كان مسافر

من اللحظة اللي فتحت فيها حساب الجمعيات وشفت المبلغ اللي جمعته لراضي على مدار ست سنين حسيت إن قلبي اللي كان بيتقطع من شوية بدأ يهدى

مش عشان الوجع راح لا عشان أخيرًا فوقت

ست سنين وأنا عايشة على أمل اليوم اللي يرجع فيه جوزي ونبدأ حياتنا من جديد

ست سنين كنت بصحى من النوم على صوت رسالته وهو بيقولي صباح الخير يا حبيبتي وبنام وأنا مستنية مكالمته اللي كان ساعات بيختصرها في دقيقتين بحجة الشغل والتعب

ست سنين كنت بحرم نفسي من حاجات كتير عشان أوفر فلوسه وأدخلها في جمعيات وأحوشها له

كنت بقول لنفسي راضي بيتعب بره عشان مستقبلنا وأنا لازم أتعب هنا عشانه

لكن واضح إني كنت لوحدي اللي بفكر في المستقبل ده

أما هو فكان بيخطط لمستقبل تاني خالص

قفلت الموبايل ومسحت دموعي ووقفت قدام المراية

بصيت لنفسي وقلت

ـ فوقي يا سلوى انتي مش هتفضلي طول عمرك الضحية اللي كل الناس بتدوس عليها وهي ساكتة

غسلت وشي وخرجت من المطبخ وأنا سامعة صوت ضحك سارة وراضي في أوضة النوم

سارة كانت بتقوله

ـ طب ما تيجي نروح نختار مكان المشروع النهاردة ونخلص بدل ما نفضل قاعدين كده

رد عليها راضي

ـ أنا تحت أمرك يا ستي بس الأول عايز أخلص موضوع الفلوس

ـ فلوس إيه

ـ الفلوس اللي سلوى كانت بتجمعها لي طول السنين اللي فاتت

قلبي دق بسرعة

يعني هو فاكر الفلوس

وفاكر إني كنت بجمعها له

سارة ضحكت وقالت

ـ أمال إنت فاكر مراتك هتكون عملت إيه طول السنين دي غير إنها تصرف الفلوس اللي بتبعتها

رد راضي بثقة

ـ لا يا حبيبتي سلوى مش بتصرف كتير وأنا كنت ببعت لها مبلغ كويس كل شهر وعارف إنها بتحوشهولي

ـ طب ما تجيبها دلوقتي وتقول لها تطلع الفلوس كلها وتخلصنا

ـ ما هو ده اللي هعمله بس مش قدامك دلوقتي

ـ ليه يعني أنا مش من حقي أعرف

ـ انتي كل حاجة تخصني من حقك تعرفيها

ضحكت سارة ضحكة خلت الدم يغلي في عروقي

ـ طب ما دام كده أنا عايزة أعرف هتكتب المشروع باسمي إمتى

اتسمرت مكاني

مشروع باسمه ولا باسمها